Өмірде өз орынымды тауып, кәсібімді таңдауға

ұйымшыл ұжымым әсер етті.

Біздің әріптесіміз Замзагүл Хайдарқызы Шамгунова №17 Қалалық емханада 2016 жылдан бері еңбек етіп келеді. Емханаға алғаш тіркеу бөлімшесіне регистратор болып қызметке орналасқан Замзагүл Хайдарқызы болашақ мамандығын таңдап, өмір жолында өзгерісімен бөлісті: «Мен 2016 жылы осы емханаға регистратор болып қызметке орналастым, төрт жылға уақыт ішінде ұйымшыл ұжымнан кеткім келмейтінін және болашақтағы орыным мен таңдауым медицина екенін түсіндім, жалпы медбике мамандығының қаншалықты маңызды екенін де түсіндім. Әріптестеріммен ақылдаса келе, 2019 жылы Ресей-Қазақстан Медициналық университетіне қарасты колледжге түсіп, медбике мамандығын игердім. Осы таңдауымның дұрыс болғанына қуанамын, қазір еңбегімнің жемісін көріп отырмын десем болады. Отбасымызда екі ұлымыз бар, қай ана баласын жамандық ойлайды, мен де балаларымның жетістікке қол жеткізгенін тілеймін, сондықтан кіші ұлым Елнұр қазір 8-ші сыныпта оқиды, келесі жылы Медициналық колледжге түсемін дейді, мен ьолсам болашақта баламның ары қарай оқып, дәрігер болуын қалаймын. Қазақта «шәкірті ұстазынан озса – бақыт» - дейді, мен де баламның менен озып, тамаша маман болуын, елімізге танымал дәрігер болуын тілеймін. Ал мен үшін мамандығымның ең маңыздысы – әр келген пациенттің ризашылығы, ауырмай тек кеңес алуға келуі деп ойлаймын. Ол үшін пациент дәрігердің берген тағайындамасын дер кезінде дұрыс пайдаланып, өз денсаулығына жауапкершілікпен қараса болғаны». Әріптесіміз Замзагүл Шамгуноваға еңбегіне жетістік пен жеңістік тілеп, алда келе жатқан мерекесімен құттықтаймыз.

Арман - алға жетелейді!

Өмір жолын қатардағы медбике лауазымынан бастап, біліктілігі мен білімін жетілдіріп, жетістіктерге қол жеткізген әріптесіміз Шолпан Кеңесқызы Шайымова 1992 Республикалық медицина училищесін аяқтап, 1999 жылы «Эмили» бикелер ісі жөніндегі институтын, ал 2018 жылы С.Асфендияров атындағы Қазақ Ұлттық Медицина университетінің магистратурасын тәмамдаған. Шолпан Кеңесқызы 1994 жылы қаламыздағы ең танымал ірі клиника – Жедел медициналық жәрдем ауруханасына медбике болып орналасып, кардиология мен хирургия бөлімшелерінде өз мамандығының қыр-сырын иегереді, жас маманның талпынысы мен мамандығына деген сүйіспеншілігі болашаққа зор үмітпен қарайтындығын танытса керек: «Жедел медициналық жәрдем ауруханасындағы ең жауапты кардиология бөлімшесіне қызметке орналастым, өмір мен өлім арасында жанталасқан пациенттерге дер кезінде қол ұшын созып, дәрігерлермен қатар кезекшілік кезінде барынша көмек көрсетуге тырысатынбыз. Мен үшін бұл – үлкен өмір мектебі, керемет жандардан алған кәсіби тәжірибе болды. Сол кезде алған еңбек жолының әр кезеңі мен үшін өте маңызды. Қазір ойлап қарасам, «Арман - алға жетелейді» деген сөздің қандай тап айтылғанына таң қаламын, себебі күні бойы науқастарды қабылдап, түні бойы емдеу шараларын жүргізіп, таңғы төрт-беске таман қолымыз босайтын, сонда біздің ауруханаға қарама қарсы орналасқан Санжар Асфендияров атындағы медициналық университетке терезеден қарап отырып, «міндетті түрде осы университетте оқуым керек, жай медбике емес жақсы маман болуым керек» - дейтінмін. Міне, сол балалық арман орындалып, С.Асфендияров атындағы Мемлекеттік Медициналық университетінің магистратурасын тәмамдадым. Абай атамыз «Сен де бір кірпіш дүниеде, кетігін тап та, бар қалан» - деген екен, сол өмір кетігін тауып, арманым орындалып, өз мамандығымды игергеніме ризамын» - дейді Шолпан Шайымова.

№17 Қалалық емхана ұжымы атынан Шолпан Кеңесқызын кәсіби мерекесімен құттықтап, алдағы уақытта арман-тілектерінің орындала беруін, жақсылық пен жетістікке қол жеткізуін тілейді.