Бүгін Мемлекет басшысы Қасым-Жомарт Тоқаев қос палатаның бірлескен отырысына қатысып, Қазақстан халқына Жолдау жасады. Атап өтерім, осы Жолдау халықтың көкейіндегі өзекті мәселелерді айқындап, нақты бағдарымызды белгілеп берді. Елінің ертеңіне алаңдаған Мемлекет басшысы: «Отаншылдық рухы жоғары ел – көздеген мақсатына қалай да жетеді. Біздің мұратымыз – Жаңа Қазақстан құру. Бұл нені білдіреді? Жаңа Қазақстан дегеніміз – егемен елдің болашақтағы бейнесі. Өз елінің ертеңіне сенбеген халық – мықты мемлекет құра алмайды. Бұл тарихтан талай мысал келтіруге болады. Біздің келешегіміз кемел боларына және жарқын болашақты өз қолымызбен жасай алатынымызға сенеміз» - деп атап өтті. Сонымен қатар, елді мекендерде халыққа қолайлы жағдай жасау үшін өзгерістер ұсынылды. Алматы облысын екі аумақтық облысқа бөлу арқылы халық пен билік арасындағы байланысты жақсарту көзделгені мәлім, Семей қаласын орталықтандырып, Абай облысын құру, Жезқазған облысының аумағында Ұлытау облысын құру арқылы елдің рухын көтеретін мықты шешім қабылданды деп ойлаймын. Сонымен қатар, әкімдерді сайлау, сенат пен мәжіліс бағытындағы ұсынылған өзгерістер Жаңа Қазақстанның болашағын айқындайтын қадамдардың бірі деп ойлаймын.
Құрметпен, Айгүл Тәжиева